Ժամանակակից տեխնոլոգիայի կիրառում
Մումին Իսամիդինովն առաջարկում է կիրառել մետաբիսուլֆիտային ներդիրներ, որոնք թույլ կտան խաղողը թարմ պահել մինչև 6 ամիս։ Նախքան դրանց կիրառումը նա խորհուրդ է տալիս փոփոխություններ կատարել ինչպես այգիների մշակության գործընթացում, այնպես էլ մեծ ուշադրություն դարձնել առկա սառնարանային տնտեսությունների վերազինմանը, այն է՝ հին ու քիչ արդյունավետ սարքավորումները փոխարինել նորագույն պահանջներին համապատասխան, էլեկտրոնային և թվային կառավարումով շահագործվող սառեցման և օդափոխման համակարգերով ու տեխնոլոգիաներով։
Տեխնոլոգիայի կիրառումը թույլ կտա.
· պահպանել բերքի ապրանքային տեսքն ու համը՝ ապահովելով մրցունակություն արտահանման շուկաներում,
· խելացի տնտեսավարման միջոցով ստանալ ավելի մեծ շահույթ։
«Հայաստանն ունի բոլոր անհրաժեշտ պայմանները՝ բարձրորակ խաղող արտադրելու, ինչպես նաև արտահանման և երկարաժամկետ պահպանման պայմաններ ձևավորելու համար։ Մենք ներկայացնում ենք այն տեխնոլոգիաները, որոնց հասել ենք վերջին 5-10 տարիների ընթացքում, ինչպես նաև խաղողի պահպանման ժամանակակից մեթոդները, որոնց օգնությամբ կարողանում ենք խաղողի պահպանման ժամկետը 20-30 օրից երկարացնել ու հասցնել մինչև 5-6 ամիս»,- նշել է Մումին Իսամիդինովը։
«Մումին Իսամիդինովը Ուզբեկստանի առաջատար փորձն է ներկայացնում մեր ֆերմերներին, թե ինչպես են 15 տարիների ընթացքում իրենք հասել այնպիսի արդյունքների, որ արտահանում են ավելի որակով արտադրանք, քան Հայաստանն է կարողանում։ Մեր նպատակն է հայկական արտադրանքի որակը հասցնել այնպիսի մակարդակի, որ անմիջապես ազդի արտադրության ծավալների ավելացման վրա։ Խոսքը վերաբերում է և՛ մշակման ծավալների ավելացմանը, և՛ սառնային տնտեսությունների վերափոխմանը»,- նշել է Ակբա Ֆեդերացիայի համայնքների հետ տարվող աշխատանքների գծով պատասխանատու Գեղամ Ռոստոմյանը։
Ակբա Ֆեդերացիան շարունակում է աջակցել գյուղական համայնքներում խելացի բիզնես-միջավայրի ձևավորմանը։
Ակբա Ֆեդերացիան Ակբա բանկի միակ նշանակալից մասնակիցն է, բանկի բաժնետոմսերում ունի ավելի քան 75 տոկոս մասնաբաժին: Ակբա բանկում ունեցած մասնակցության շնորհիվ Ակբա Ֆեդերացիան նպաստում է Հայաստանի ողջ տարածքում գյուղատնտեսության, գյուղական շրջաններում փոքր և միջին բիզնեսի զարգացմանը, համայնքների զարգացմանը, համայնքներում բիզնես միջավայրի աշխուժացմանն ու ամրապնդմանը, նշված ոլորտներում ձեռնարկատիրական գործունեություն իրականացնող յուրաքանչյուր անձի բարեկեցության աճին:
