Թվով 8 դասընթացներ "Տոհմային ոչխարաբուծություն", "Ջերմոցային տնտեսություն", "Բարձրարժեք մշակաբույսեր" և Նորարարական տեխնոլոգիաներ մեղվաբուծության մեջ" թեմաներով ընդգրկեցին 154 մասնակիցներ Հայաստանի տարբեր մարզերից։
"Տոհմային ոչխարաբուծություն" դասընթաց
Այս թեմայով թվով 3 դասընթացները անցկացվել են "ՎԻՊԵԿՈ" արտադրական լաբորատորիայի ուսումնական մասնաշենքում մեր գործընկեր "ԿՏ ԱԳՐՈ" ՍՊԸ -ի կողմից Հայաստանի բոլոր մարզերից ժամանած ֆերմերների համար
Դասընթացավարներ Տ.Չիթչյանը և Կ.Կարապետյանը ներկայացրեցին ինչպես ավանդական ոչխարաբուծության վարման , այնպես էլ նոր ցեղերի տոհմային գործի կազմակերպման և ավելի արդյունավետ մեթոդների կիրառման հնարավորությունները Հայաստանի պայմաններում։ Ներկայացվեցին մի շարք ցեղերի, այդ թվում Blanch du Massif Central ցեղի առանձնահատկությունները և առավելությունները, ինչպես նաև հեռանկարները մեզ մոտ։ Խոսվեց նաև դրանց ներկրման , վաճառքի , ինչպես նաև պետական սուբսիդավորման ծրագրերի մասին։
Մասնակիցները շատ ակտիվ էին և հետաքրքրված։ Շատերը կիսվեցին իրենց փորձով ՝ ներկայացնելով ավանդական ոչխարաբուծության խնդիրները, համեմատականներ տարան առկա և նոր ցեղերի միջև։
Դասընթացի վերջում մասնակիցների կողմից իրականացվեց դասընթացի անցկացման և դասընթացավարների գնահատում։
"Բարձրարժեք մշակաբույսեր" և "Ջերմոցային տնտեսություն" դասընթացները
Արդեն հինգերորդ տարին է , որ ԱԿԲԱ Ֆեդերացիան "ԿԱՆԱՉ Արահետ" ՀԿ-յան հետ միասին անց է կացնում "Բարձրարժեք մշակաբույսեր" թեմայով դասընթացները։
Հաշվետու ժամանակահատվածում անցկացվել են 2 դասընթացներ, որոնց ընթացքում մասնակիցները ծանոթացել են հողի լաբորատոր հետազոտության անցկացման անհրաժեշտության հիմնավորմանը, հողի նախապատրաստման, սնուցման և այլ ռեժիմների ճիշտ վարման մեթոդներին/ դասընթացավար Կարեն Մինասյան/։
Դասընթացավար Նունե Սարուխանյանը ներկայացրեց ավանդական բուսատեսակների և բարձրարժեք մշակաբույսերի մշակության առանձնահատկությունները , անդրադարձավ թե ինչ բարձրարժեք մշակաբույսեր և դրանց սորտեր արդյունավետ է մշակել այս կամ այն մարզում՝մանրամասն խոսելով սերմերի ընտրությունից մինչև բերքահավաք տարվող աշխատանքների ողջ ցանկի մասին։ Կարևորություն տրվեց նաև Կայուն գյուղատնտեսության վարման հնարավորություններին, ինչպես նաև որակյալ արտադրանք ստանալու և իրացման ուղիներ փնտրելու գործընթացի ճիշտ կազմակերպմանը։
Վերջում կատարված խմբային աշխատանքները էլ ավելի ամրապնդեցին ֆերմերների ստացած գիտելիքները։
Նաև Ֆերմերների կողմից կատարվեց դասընթացի գնահատում։
Ելնելով նախորդ տարվա դասընթացների և այնուհետև հատուկ անցկացված հարցումների ժամանակ ֆերմերների կողմից հնչեցրած պահանջարկից՝ այս տարի առաջին անգամ անցկացվեցին "Ջերմոցային տնտեսություն" թեմայով 2 դասընթացներ։
Դասընթացավարները մանրամասն ներկայացրեցին , թե ինչպիսի առանձնահատկություններ ունի փակ գրունտում մշակաբույսերի մշակումը՝ հաշվի առնելով և ռիսկերը, և այս ավելի եկամտաբեր ճյուղի օգուտները։
"Նորարական տեխնոլոգիաներ մեղվաբուծության մեջ" դասընթացը
Այս թեմայով դասընթացները նախորդ տարվանից իրականացվում է "Մեղվաբուծության Դարբնոց" գիտակրթական կենտրոնի հետ համագործակցության շնորհիվ։ Դասընթացավար՝ ՄԵՂՎԱԲՈՒԾՈՒԹՅԱՆ ԴԱՐԲՆՈՑ գիտակրթական կենտրոնի հիմնադիր տնօրեն Տիգրան Սեդրակյանը նախ ծանոթացավ մասնակից մեղվաբույծների առկա խնդիրներին և ակնկալիքներին։ Այնուհետև ըստ օրակարգի անդրադարձավ մեղվաբուծության բոլոր հարցերին՝ սկսած անվտանգության կանոններից մինչև մայրաբուծություն և իրացման հնարավորությունների ճիշտ օգտագործում ։ Մեղվաբույծների մեծամասնությունը ավանդական մեթոդներով են վարում իրենց մեղվաբուծությունը և ընթացքում շատ հարցեր տվեցին պարզաբանելու , թե ինչում են իրենք թերանում , ինչու է իրենց արտադրանքը քիչ ստացվում կամ պայքարը հիվանդությունների դեմ ինչու է անարդյունավետ։
Երկօրյա դասընթացը անցավ շատ ինտերակտիվ և հետաքրքիր մթնոլորտում։ Վերջում դասընթացավարը անցկացրեց հատուկ հարցում գնահատելու համար մասնակիցների ստացած գիտելիքները։
Նաև Ֆերմերների կողմից կատարվեց դասընթացի գնահատում։
Հետագա դասընթացները անց են կացվելու ըստ սահմանված գրաֆիկի ՝ նպատակ ունենալով բոլոր թեմաներով դասընթացները անցկացնել Հայաստանի բոլոր մարզերից ընդգրկված ֆերմերների համար։
